Dr Lorenz Christoph Mizler [de Kolof] (* 26. Juli 1711 z Heideheim in Middelfranke; † 8. Mai 1778 z Warschau) isch e dütsche filosofische Gleerte, Schriftsteller, Mediziner, Buechdrucker, Buechhändler, Muusigtheoretiker und Muusigwüsseschaftler gsi. Er isch bsundrigs wichdig für d Bachforschig und für die polnischi Ufkläärig. Siini Mueter isch a Schwiizere gsi, d Barbara Stumpf vo Sanggalle.
Dr Mizler het zwoo filosofischi Dissertazionen veröffentligt: D Dissertatio, quod Musica Ars sit pars eruditionis Philosophicae (Leipzig 1734) und d Programma de usu atque praestantia Philosophiae in Theologia, Iurisprudentia, Medicina (Leipzig 1736). Für e Dokter vo dr Medizin het er d Dissertatio Inavgvralis Medica De Balsami Vvlnerarii Vniversalis Vsv Ac Praestantia: in omnibus vulneribus, ulceribus tum inveteratis tum venereis, omnibus externis et plurimis internis inflammationibus (Erfurt 1747) gschriibe. Er isch en Aahänger vom Filosoof Christian Wolff gsi, wo dr Wolff dr Filosofii dr Vorrang vor dr Theologii gee het.
1738 het dr Mizler die Correspondierende Societät der musicalischen Wissenschaften gründet. Das isch e virtuelli Gmäinschaft gsi, wo d Mitgliider iiri Mänige nume in iirer Korrespondänz usduscht häi. Zu de Mitgründer häi dr Giacomo de Lucchesini († 1739) und dr Georg Heinrich Bümler (1669–1745) ghöört. Bedütendi Komponiste wie dr Händel, dr Telemann, dr Stölzel, dr Graun und dr Bach si Mitgliider gsi.
Er het e Generalbass-Leer, veröffentligt, won er din d Grundsetz vo dr zitgenössische Muusigleer süstematisch dargstellt het.